WTA 2016 yilgi mavsumning eng yaxshi turnirlarini aniqladi

Etiborlisi, yilning eng yaxshi turnirlarini tennischilarning o'zlari aniqlashadi. Premier 5 toifasiga kiruvchi turnirlar orasidan Rimdagi Internazionali BNL d’Italia turniri 2016 yilgi mavsumning eng yaxshisi deb topildi. Unda Serena Uilyams g'alaba qozongandi.

Premier toifasidagi turnirlarda esa katta farq bilan SHtutgart shahrida tashkil etilgan Porsche Tennis Grand Prix turniri g'olib bo'ldi. Germaniyadagi mazkur turnir dunyoning birinchi raketkasi, mezbon tennischi Anjelik Kerberning g'alabasi bilan yakunlangandi.

Premier Mandatory kategoriyasiga kiruvchi turnirlar orasida BNP Paribas Open eng yaxshisi bo'ldi. AQSHning Indian-Uells shahrida o'tgan bu yilgi turnirda belaruslik Viktoriya Azarenko bosh mukofot sohibasiga aylangandi.

International (Amerika) toifasidagi turnirlarda Meksikaning Akapulko shahrida bo'lib o'tgan Abierto Mexicano eng yaxshisi deb topildi. Amerikalik Sloan Stivens ushbu turnir g'olibasiga aylangandi.

International (Evropa) turnirlari orasida SHveciyaning Bostad shahrida tashkil etilgan Ericsson Open tennischilar etirofiga sazovor bo'ldi. Turnir bosh mukofoti Laura Zigemundga nasib etgan.

Osiyo-Okeaniya mintaqasida esa tennischilar ASB Classic turniriga ovoz berishdi. Yangi Zelandiyaning Oklend shahrida o'tgan turnir amerikalik Sloan Stivensning g'alabasi bilan yakun topgandi.