Xanchjou-2022, Parij-2024: Xorijlik murabbiylarning fikri tinglandi

Kecha jamoalarimizda faoliyat olib borayotgan xorijlik murabbiylarning mazkur dastur bo'yicha fikr-mulohazalari tinglandi. ZOOM platformasida kechgan mazkur yig'ilishni MOQ prezidenti maslahatchisi Nazirjon Xudoyqulov olib bordi. 

Unda qilichbozlik bo'yicha 3 karra Olimpiya o'yinlari chempioni rossiyalik Vladimir Nazlimov, dzyudo bo'yicha Olimpiya o'yinlari g'olibi greciyalik Ilias Iliadis, karate bo'yicha tajribali murabbiy SHahob Sultani kabi jamoalarimizda ishlayotgan 10 nafarga yaqin xorijlik va mahalliy murabbiylar, MOQ qoshida tuzilgan tezkor shtab boshlig'i SHerzod Tashmatov qatnashdi.

Tadbir avvalida murabbiylar uchun dastur g'oyasi, mohiyati va maqsadlari tushuntirib o'tildi.

“Bizning oldinda turgan asosiy maqsadlarimiz Tokiodan keyingi yirik kompleks musobaqalar – Xanchjou-2022 Osiyo o'yinlari va Parij-2024 Olimpiya o'yinlari bo'ladi. Sizlarda uzoq yillik tajriba bor. Barchangizni fikringizni bilish biz uchun muhim. Mana shunday tajriba almashish orqali jamoalarimizning muvaffaqiyatli ishtirokiga hissa qo'shishimiz mumkin. Maqsadimiz Sizning ham metodikangizni tatbiq qilish”, – dedi Nazirjon Xudoyqulov.

SHundan so'ng Vladimir Nazlimov, triatlon bo'yicha tajribali murabbiy Viktor Zemcov, og'ir atletika bo'yicha trener-konsultant Erjas Boltaev, SHahob Sultani, janubiy koreyalik taekvondo murabbiyi Kim Yung Jing, Ilias Iliadis kabi mutaxassislar ham so'z olib, taqdimot bo'yicha o'z fikrlari bilan o'rtoqlashishdi.

“Taqdimot yaxshi ishlab chiqilgan. Barchasi batafsil ko'rsatib o'tilibdi. Bilasizmi, bunga qo'shimcha sifatida shuni aytish mumkinki, unda asosan yoshlar musobaqalarini ko'paytirishga etibor qaratish kerak. Avval, Sobiq Ittifoq davrida shu narsa yaxshi yo'lga qo'yilgani uchun kuchli zaxira etishib chiqavergan. Hududlarda yosh iqtidorli sportchilar ko'p. Lekin ular muntazam xalqaro musobaqalarda ishtirok etishmasa, terma jamoaga saralab olomasak, biz ularni yo'qotib qo'yamiz”, – dedi Erjas Boltaev.

O'z navbatida, Vladimir Nazlimov Boltaevning fikrini qo'llab quvvatladi va mazkur tizim Alisher Usmonov Xalqaro qilichbozlik federaciyasi rahbarligiga kelgandan so'ng ushbu sport turida tatbiq qilingani va bu katta samara berganini qo'shimcha qildi.