Yarimmarafonda 7 yoshdan 70 yoshgacha bo'lgan minglab aholi birlashdi

Yoshu-qarini sportga oshno etish maqsadida Xorazm viloyatining barcha hududlarida keng ko'lamli jismoniy tarbiya va sport tadbirlari tashkil qilib kelinmoqda. Birgina millionlar o'yini hisoblangan futbol bo'yicha «Futbolimiz kelajagi», «Mahallada futbol», «CHarm to'p», «Hokim kubogi» va «Rahbar kubogi» musobaqalarining tashkil etilishi orqali deyarli barcha yoshdagi aholi qatlamlari ommaviy sport musobaqalariga jalb qilinmoqda.

SHuningdek Xorazm viloyati jismoniy tarbiya va sport boshqarmasi tashabbusi bilan joriy yil 12-18 oktyabr kunlari butun viloyat bo'ylab «Sport haftaligi» tashkil qilindi. Mazkur haftalik doirasida ommaviy badantarbiya mashqlari, «Sog'lom hayot uchun 5000 qadam» loyihasi, sportning o'yin turlari bo'yicha «Tuman hokimi kubogi» musobaqalari, «Milliy sport o'yinlari» festivali, Xotin-qizlar spartakiadalari, velomarafonlar va boshqa ommaviy sport tadbirlari tashkil qilindi. Bundan ko'zlangan maqsad, viloyatdagi yoshu-qari va erkagu-ayolni jismoniy tarbiya va sportga keng jalb qilishdan iborat.

Kuni kecha tashkil qilingan ommaviy yurish marafoni «Sport haftaligi» doirasidagi ommmaviy tadbirlarning mantiqiy davomi va chinakam sport bayramiga aylanib ketdi. «Sog'lom hayot sari 5000 qadam» shiori ostida Urganch shahrining Al-Xorazmiy shoh ko'chasida tashkil qilingan ommaviy yurish yarimmarafonida 7 yoshdan 70 yoshgacha bo'lgan 6000 nafardan ortiq aholi qamrab olindi. Yarimmarafoni start chizig'ining oldi qatoridan o'rin olgan velo va moto sportchilar, yosh kartingchilar mazkur ommaviy sport tadbirini yanada ko'tarinki ruhda o'tishida o'z hissalarini qo'shishdi.

Yarimmarafon ishtirokchilarini tantanali taqdirlash marosimi Urganchdagi Jaloliddin Manguberdi yodgorlik majmuasining oldida tashkil etildi. Yarimmarafonda faol qatnashgan ishtirokchilar orasidan «Eng yosh ishtirokchi», «Eng yoshi ulug' ishtirokchi», «Faxriy sportchi», «Eng chaqqon ishtirokchi», «Eng irodali ishtirokchi» kabi o'nlab nominaciyalar bo'yicha g'oliblar aniqlanib, ular diplom va esdalik sovg'alari bilan taqdirlandi.

Ommaviy yurish bo'yicha yarimmarafonlar viloyatdagi barcha tumanlarda qizg'in davom etmoqda.