Yilning dastlabki "Katta Dubulg'a"si boshlandi. Denis Istomin nima uchun "Australian Open"da qatnashmayapti?

Yangi mavsumning ilk "Katta Dubulg'a" musobaqasi - Avstraliya Ochiq chempionatiga xam start berildi. Musobaqa boshlandiyu, lekin nimadir etishmayotgandek...

Avstraliyada bo'lib o'tgan yong'inlar natijasida hosil bo'lgan tutun xuddi nafasimni siqib qo'yganday, lekin men O'zbekistondaman-ku...

Har safar "Katta Dubulg'a" musobaqalari boshlanishi bilan nigohimiz hamyurtimiz Denis Istominga qaratiladi. Ha, bu safar tennisimiz afsonasi 12 yillik ananani buzishga majbur bo'ldi. O'tgan yili Istominning o'yinida pasayish kuzatilganligi bois, musobaqalarda barqaror ishtirok eta olmadi. SHu bois, reytingdagi o'rnini ham sezilarli darajada yo'qotdi. Buning natijasida biz etiborimizni mavsumning ilk haftalarida kuzatishga o'rganib qolganimiz ATP musobaqalari emas, balki Tailandda bo'lib o'tayotgan "CHellenjer" turnirlariga qaratishga majbur bo'ldik. 

Hozirda Denis ATP reytingida 170-o'rinda bormoqda. To'g'risi, qachon Denisni so'nggi bor bundan o'rinda ko'rganimni eslay olmayman ham. To'g'ri, u reytingdagi o'rniga ko'ra "Australian Open" saralash bahslariga ilinardi, lekin Denis buning o'rniga "CHellenjer" musobaqalarda reyting ochkolarini jamg'arib olish variantini tanladi. Bu ham o'zini oqladi deb ayta olmaymiz. Birinchi haftada kutilmaganda uchinchi bosqichdayoq o'zidan reytingda ancha pastda bo'lgan tennischiga yutqazib qo'ydi. Ikkinchi xafta voqealari rivojini esa kuzatamiz.

Istomin faoliyati davomida hozirgi kunga qadar ATP musobaqalari yakkaligida ikkita, juftlik bahslarida esa uchta sovringa ega chiqqan. Osiyo o'yinlari kumush va oltin medallari sohibi, Olimpiya o'yinlari ishtirokchisi hisoblanadi. SHu yili Tokioda bo'lib o'tadigan Olimpiya o'yinlaridagi ishtirokini ham birinchilardan bo'lib naqd qilib qo'ygan.

CHamasi besh-olti yil ilgari Istomin (28 yosh edi, aniq esimda) intervyularidan birida jurnalistning: "Faoliyatingizni necha yoshgacha davom ettirmoqchisiz?" degan savoliga yana to'rt-besh yil o'ynasam kerak deb javob bergan edi (kulib). Bu yil u 34 yoshni qarshilaydi va balki bu mavsum faoliyatidagi so'ngisi bo'lishi xam mumkin...

Yosh tennischilarmiz diqqatiga: yulduzlik kasalini chetga surib qo'ying. Faqat mehnat, xarakat, intilish natijasida kamida Denis Istomin darajasiga chiqsa bo'ladi. Aks holda poezddan yarim yo'lda tushib qolishingiz mumkin, avstraliyalik Bernard Tomich singari...

Husniddin Mirzaliev tayyorladi

Tennis olamida ro'y berayotgan eng so'nggi yangiliklarni telegramdagi TENNIS YANGILIKLARI kanalida kuzatib boring.