11 километрлик хавфсиз ҳудуд. UFC "Жанглар ороли"ни қандай қилиб энг хавфсиз ҳудудга айлантирди?

"Жанглар ороли"да жами тўртта турнир ўтказилади. Бу турнирларда мухлислар бир-бирдан қизиқарли ҳамда чемпионлик жангларини томоша қилишлари мумкин бўлади. Ҳозирда бутун дунё пандемия сабабли қийинчиликка учраётган бўлишига қарамай, UFC охиргача борди ва мукаммал хавфсизлик ҳудудини яратишга эришди.

11 километрлик хавфсиз ҳудуд 11-26 июль кунлари оралиғида UFC қарамоғида бўлади. Бу ерда ишлайдиган ҳар бир ходим 19 июнь куни олиб келинган ва уларнинг барчаси 14 кунлик карантинга жойланган. Бу вақт оралиғида барча уч марта коронавирусга тест топширган. Шунингдек, "Жанглар ороли"ни барпо этиш учун жами 740 нафар ишчи ишлади, улар барчасини битириб бўлишганидан сўнг оролдан чиқариб юборилди. Оролни Абу-Даби полицияси узлуксиз равишда қўриқламоқда. Оролга рўйхатга олинмаган ҳеч бир инсоннинг киришга имкони йўқ. Июлдан бошлаб "Жанглар ороли"га UFC жангчилари ва уларнинг штаби киритила бошланди. Оролга киришдан 48 соат аввал ташрифчилар тест топширади ва "тоза" чиққанларгина оролга киритилади. Жанглар “Flash Forum” саройида бўлиб ўтади. Бу ерда ҳар бир персонал учун мукаммал шароит яратиб берилган. Дезинфекция ишлари учун инновацион йўлаклар ташкил этилган ва бу йўлак вирусни 99 фоизга йўқ қилиш имконига эга. Ҳар бир хонада спортчи шуғулланиш ва дам олиши учун тўлиқ шароитлар бор.

Ташкилотчилар октагон ҳудудига ҳам жиддий эътибор қаратишган. Октагон очиқ жойда бўлгани сабабли, энг янги технологияли кондиционер ўрнатилган ва унинг ёрдамида октагон атрофи салқин ҳолга келтирилган. Шунингдек, ҳар бир баҳс олдидан дезинфекция ишлари амалга оширилади. Спортчилар машғулот олиб боришлари учун "Жанглар ороли"да яна битта октагон қурилган ва у ерда ҳам ҳар бир спортчи билан машғулотидан сўнг тозалаш ишлари олиб борилади.