Рамазон Темиров UFC'даги иккинчи жанги, манзили, санаси ва рақибини тасдиқлади

Ҳамюртимиз 2025 йилнинг 1 март куни АҚШнинг Лас-Вегас шаҳрида ташкил этиладиган UFC турнири доирасида октагонга чиқади. Буни сайтимиз мухбирига берган интервьюсида Темировнинг ўзи тасдиқлади. 

Унга кўра, Рамазон Темиров Вегасдаги турнир доирасида америкалик Чарльз Жонсонга қарши октагонга чиқади. Рамазон бу жангга розилик берган ва тайёргарликни аллақачон бошлаб юборган. 

Маълумот учун, Чарльз Жонсон ММАда 17 ғалаба ва 8 мағлубият қайд этган. Ҳозирда 4 та ғалабали серия билан келмоқда. 33 ёшли Жонсон сўнгги жангини шу йилнинг 19 октябрь куни UFC Fight Night 245 турнири доирасида Су Мудаержига қарши ўтказиб, ҳакамларнинг якдил қарори билан ғалаба қозонганди. Темиров эса 13 октябрь куни АҚШ вакили Си Жей Вергарани биринчи раунддаёқ нокаутга учратиб, UFC'да муваффақиятли дебют қилган эди.