16 окт 08:45
Янгиликлар

Шахмат

15 ёшли гроссмейстеримиз Нодирбек афсонавий Вишванатан Ананд билан ўйнади ФОТОГАЛЕРЕЯ

Шу кунларда Англиянинг Мэн оролида дунёнинг 154 нафар кучли шахматчилари иштирокидаги нуфузли халқаро турнир бўлиб ўтмоқда.

Мукофот жамғармаси 433 000 АҚШ долларини ташкил этувчи Grand Swiss турнирида Ўзбекистон шарафини 17-жаҳон чемпиони Рустам Қосимжонов ҳамда 15 ёшли халқаро гроссмейстеримиз Нодирбек Абдусаттаров ҳимоя қилмоқда. Қосимжонов 2657, Абдусаттаров эса 2608 рейтинг очкосига эга.

Мусобақада муваффақиятли дона сураётган истеъдодли шахматчимиз, 15 ёшли халқаро гроссмейстер Нодирбек Абдусатторов 6-турда қора доналарда собиқ жаҳон чемпиони, ҳиндистонлик Вишванатан Анандга қарши ўйнади ва 47-юришдан сўнг мағлубиятини тан олишга мажбур бўлди.

Олти имкониятдан 3,5 очко жамғарган Нодирбек қўшимча кўрсаткичларга кўра 32-ўринни эгаллаб турибди. Мусобақада 106-рақам остида таснифланган ҳамюртимиз бир тур аввал кетма-кет икки халқаро гроссмейстерни мағлуб этгач, турнир жадвалида 10-ўринга кўтарилиб олган эди.

Бугун халқаро турнирда дам олиш куни сифатида эълон қилинган. Эртага Абдусатторов 7-турда ўзи сингари 3,5 очко жамғариб турган украиналик халқаро гроссмейстер Павел Эльянов (2663)га қарши оқ доналарда ҳаракат қилади.