15 ёшли халқаро гроссмейстеримиз нуфузли турнирда очко жамғаришда давом этмоқда

Мукофот жамғармаси 433 000 АҚШ долларини ташкил этувчи Grand Swiss турнирида Ўзбекистон шарафини 17-жаҳон чемпиони Рустам Қосимжонов ҳамда 15 ёшли халқаро гроссмейстеримиз Нодирбек Абдусаттаров ҳимоя қилмоқда. Қосимжонов 2657, Абдусаттаров эса 2608 рейтинг очкосига эга. 

Мусобақада муваффақиятли дона сураётган истеъдодли шахматчимиз, 15 ёшли халқаро гроссмейстер Нодирбек Абдусатторов 8-турда қора доналарда ўйнашига қарамай, россиялик халқаро гроссмейстер Санан Сюгиров (2662) билан дуранг қайд этди. 

Саккиз имкониятдан 4,5 очко жамғарган Нодирбек қўшимча кўрсаткичларга кўра 38-ўринни эгаллаб турибди. Мусобақада 106-рақам остида таснифланган ҳамюртимиз бугун ўтказиладиган 9-турда хитойлик халқаро гроссмейстер, талабалар ўртасида жаҳон чемпиони 33 ёшли Бу Сянчжига қарши оқ доналарда баҳс олиб боради.