17 ноя 17:56
Янгиликлар

Бокс/ММА

2 декабрь кунги проф бокс оқшомининг марказий жанги маълум + ФОТО

Пойтахтимиздаги муҳташам "Ҳумо" арена саройи навбатдаги профессионал бокс оқшомига мезбонлик қилади.

Lift Promotion промоутерлик компанияси ҳамда Ўзбекистон профессионал бокс федерацияси ҳамкорлигида ташкил этилаётган ушбу бокс оқшоми 2 декабрь куни соат 18:00да бошланади.

Эътиборлиси, ушбу профессионал бокс кечасининг марказий жанги Фазлиддин Ғоибназаров иштирокида бўлиб ўтади. Рио Олимпиадаси чемпионига яна бир ҳамюртимиз Жамшид Каримов "вызов" ташлади.

Қизиғи, ушбу жараён сайтимизда боксчиларимиз иштирокида ўтказилаётган суҳбат чоғида амалга ошди. Самарқандлик Жамшид Каримов проф рингда 11 та жанг ўтказган бўлиб, уларнинг барчасида ғалаба қозонган. Сўнгги жангини 10 ноябрь куни "Юнусобод" спорт мажмуасида ўтган бокс кечасининг марказий жангида андижонлик Зоҳиджон Ҳудойбердиевга қарши ўтказиб, муддатидан аввал техник нокаут эвазига зафар қучганди.

Фазлиддин Ғоибназаров эса сўнгги жангини 13 август куни "Ҳумо" аренада ўтган профессионал бокс кечасининг марказий жангида венесуэлалик Эйдер Паррага қарши рингга кўтарилганди. Ўн раундга мўлжалланган жанг 38 сонияда якунланганди. Фазлиддин биринчи раунддаёқ кучли зарбаси эвазига рақибини нокаутга учратган эди.

Маълумот учун, Фазлиддин Ғоибназаров ва Жамшид Каримов иштирокидаги марказий жанг 10 раунд этиб белгиланди.