20 ёшли теннисчи ўз юртида биринчи титулини қўлга киритди

Шу тариқа, франциялик иқтидор эгаси фаолиятидаги илк совринни ўз ватандошлари кўз ўнгида қўлга киритди. ATP рейтингида 117-поғонада бораётган Жованни Мпетши-Перрикар финал учрашувида дунёнинг 29-ракеткаси, аргентиналик Томас Мартин Этчеверрини қийинчилик билан мағлубиятга учратди - 6/4, 1/6, 7/6(4).

Бу теннисчиларнинг ўзаро ўтказган илк учрашуви эди. Икки соату 31 дақиқа давом этган баҳсда Мпетши-Перрикар 11, Этчеверри 5 та эйс зарбасини амалга оширган. Иккала теннисчи ҳам 2 тадан қўшхатога йўл қўйди. Брейклар гарчи Мартинда кўпроқ бўлса-да, бу унга ёрдам бермади - 5 га 3. 

Open Parc турниридаги муваффақиятли иштирок Мпетши-Перрикарга 250 рейтинг очкоси ҳамда 88,125 евро мукофот пули тақдим этди. Этчеверри эса бир ҳафталик меҳнатидан 150 очко ва 51,400 евро ишлаб олди.