2022 йилда 5 нафар собиқ UFC чемпионлари фаолиятини якунлади

Беш нафар собиқ UFC чемпионлари - америкаликлар Ти Жей Диллашоу, Фрэнки Эдгар, Люк Рокхолд, бразилиялик Жозе Альдо, польшалик Йоанна Енджейчик айнан 2022 йилда ўз фаолиятларини расман якунлаганликларини эълон қилишди.

Ти Жей Диллашоу енгил (61 кг.гача) вазн тоифасида икки карра жаҳон чемпиони ҳисобланади. У 2014 йилнинг май ойида шов-шувли тарзда ўша пайтдаги pound-for-pound, яъни вазнидан қатъий назар дунёнинг энг кучли жангчиси бразилиялик Ренан Баранни мағлубиятга учратиб, фаолиятида илк бор UFC чемпионлик камарини қўлга киритганди. 

Фрэнки Эдгар, жуссаси (бўйи 168 см) кичиклигига қарамай, енгил (70 кг.ча) вазн тоифасида UFC чемпиони бўлган. 2010 йилнинг апрель ойида у Би Жей Пенни мағлуб этиб, чемпионликни қўлга киритган. У шундан сўнг уч бор чемпионлик камарини муваффақиятли ҳимоя қилган. 

Люк Рокхолд ўрта (84 кг.гача) вазн чемпиони бўлган. 2015 йилнинг декабрь ойида ҳамюрти Крис Уайдманни тўртинчи раундда таслим этиб, чемпионлик камарига эга чиққан.

Йоанна Енджейчик аёллар дивизионининг минимал вазн (52 кг.гача) тоифасида илк бор 2015 йилнинг март ойида чемпион бўлган. У камарини 5 та жангда муваффақиятли ҳимоя қилган ва бу ҳозиргача аёл жангчилар учун рекорд натижа ҳисобланади. 

Жозе Альдо ҳам ярименгил (65 кг.гача) вазнда чемпионлик ҳимояси (7 та) борасида рекордчи бўлиб турибди. 2015 йилнинг декабрига қадар, яъни Конор Макгрегорга қарши жангига қадар вазн тоифасидан қатъий назар дунёнинг энг яхши жангчиси бўлган.