2030 йилги Осиё ўйинлари мезбонлиги кимга насиб этади? Ўзбекистон мусобақани ўтказадими?

Маълум бўлишича, мусобақа мезбонлиги учун ариза бериш муддати 2020 йилнинг 22 апрель куни якунига етган. 23 апрель куни Осиё Олимпия қўмитаси Доҳа ва Ар-Риёд шаҳарлари мезбонлик учун номзодни қўйгани ҳақида расмий маълумот берди. Кўриб турганимиздек, Тошкент ва Самарқанд шаҳарлари ушбу рўйхатда йўқ. 

Olamsport.com сайти мухбири ушбу вазиятга аниқлик киритиш мақсадида мутассадди ташкилотларга мурожаат қилди. 

Ўзбекистон шу пайтга қадар қитъа миқёсида йирик  комплекс мусобақаларини ўтказиш тажрибасига эга бўлмаганлиги боис бу ишни босқичма-босқич амалга ошириш мақсадга мувофиқ деб топилган. Шу боис, биринчи навбатда Ёшлар ўртасида Осиё ўйинларини ўтказиш, кейинчалик Осиё ўйинлари мезбонлигини қўлга киритиш мақсадга мувофиқлиги маълум бўлди. Бу эса келажакда Жаҳон миқёсидаги Олимпия ўйинларига мезбонлик қилишда замин яратади. Режага кўра, Ўзбекистон 2025 йили ўтказиладиган тўртинчи ёшлар Осиё ўйинларига мезбонлик ҳуқуқини қўлга киритишга яқин турибди ва бу борада тегишли мутассади ташкилотлар билан ишлар олиб борилмоқда.