232 кишидан иборат Ўзбекистон спорт делегацияси "Осиё болалари" комплекс мусобақасига йўл олди + ФОТО

Ўз тарихида саккизинчи бор ташкил этилаётган мусобақада 232 кишидан иборат Ўзбекистон спорт делегацияси ҳам қатнашади. Улардан 179 нафари спортчилар, 39 нафари мураббийлар ҳисобланади. Атлетларимиз 16 та спорт турида юртимиз шарафини ҳимоя қиладилар.   

Бироз аввал Ислом Каримов номидаги Тошкент халқаро аэропортида Ўзбекистон спорт делегациясини тантанали кузатиш маросими бўлиб ўтди. Унда Ўзбекистон Республикаси спорт вазири ўринбосари Шаҳрилло Маҳмудов ва бошқа масъуллар иштирок этиб, спортчиларимизга бўлажак масъулиятли баҳсларда омад тилашди.

2022 йили Россиянинг Владивосток шаҳрида ўтган VII "Осиё болалари" мусобақасида Ўзбекистон терма жамоаси 41 та олтин, 28 та кумуш, 45 та бронза, жами 114 та медаль билан давлатлар кесимида умумжамоа ҳисобида Россиядан кейин иккинчи ўринни эгаллаганди. 

Бу галги "Осиё болалари" мусобақаси ўзининг тарихий ватанига қайтган. Якутскда 24 та спорт турида жами 239 та медаллар жамланмаси ўйналади. Спорт беллашувлари жами 16 та спорт объектида ўтказилади. "Осиё болалари" мусобақасининг тантанали очилиш маросими эртага, 26 июнь куни "Туймаада" стадионида бўлиб ўтади.