28 октябрь - Халқаро дзюдо куни!

Халқаро дзюдо федерацияси (IJF) бу йилги байрам тантаналари учун расмий лого ҳамда шиор тақдим этганди. Унга кўра, бугун, 28 октябрь кунги барча байрам тадбирлари "Биргаликда кучмиз" шиори остида ўтказилади. Байрамнинг ўзи эса коронавирус ва ирқчиликка қарши кураш учун бағишланади.   

Маълумот учун, дзюдо асосчиси Дзигоро Кано айнан 28 октябрь санасида дунёга келган. Халқаро дзюдо кунининг айнан шу кунда нишонланиши ҳам бежиз эмас, албатта. Ўтган йили Халқаро дзюдо федерациясига аъзо 5 қитъанинг 200га яқин мамлакатида, шу жумладан Ўзбекистонда ҳам ўзига хос дзюдо байрами кенг тантана қилинганди. 

Аввалига Қорақалпоғистон Республикаси ҳамда барча вилоятларда бошланган байрам тадбирлари куннинг иккинчи ярмида пойтахтга кўчганди. Дзюдочиларимиз "Кўчат эк" шиори остида ўтган байрамда минглаб дарахт кўчатларини экишган эди.