Бугун Шоҳжаҳон Эргашев ва яна икки ҳамюртимиз Красногорскда жанг ўтказади

Бокс оқшомидан жами 8 та жанг ўрин олган бўлиб, уларнинг учтаси ўзбекистонлик боксчилар иштирокида кечади. Мағлубият нималигини билмай келаётган чарм қўлқоп устамиз Шоҳжаҳон Эргашев фаолиятидаги 19-жангида беларуслик Дмитрий Милиушага қарши рингга кўтарилади. Жанг яримўрта вазн тоифасида ўтказилади. 

Бешариқлик яна бир боксчимиз Мирзакамол Неъматов бугун проф рингдаги иккинчи жангини ўтказади. Бугун у россиялик Алишер Ашуровга қарши рингга чиқади. Неъматов дебют жангида россиялик Дмитрий Антиповни техник нокаут эвазига мағлуб этган эди. Бугунги рақиби эса 29 та жанг ўтказиб, 26 тасида ютқазган. 

Бугунги оқшомда рингга чиқувчи учинчи боксчимиз Алишер Шодиевнинг рақиби россиялик Магомедриза Муталибов бўлади. Ҳар икки боксчи ҳам проф рингда биттадан ғалаба ва мағлубиятга эга бўлиб турибди.