4th President Cup Masters 2025 турнирида чемпион бир тур олдин маълум бўлди

Мусобақада дунёнинг турли мамлакатларидан келган гроссмейстерлар бош соврин учун баҳс олиб боришяпти. Ҳиндистонлик Ниҳал Сарин (2701) турнирда биринчи рақам остида сараланган бўлиб, айнан у мусобақа якунланишига бир тур қолганда чемпионликни расмийлаштирди. Ниҳал кеча ўтказилган 8-турда қора доналарда ўйнаганига қарамай, асосий рақиби Шамсиддин Воҳидовни мағлубиятга учратди ва муддатидан олдин 4th President Cup Masters 2025 чемпионига айланди. 

Тажриба ўз сўзини айтди деймизу, лекин ўз қўлимиз билан бош совринни ҳиндистонлик шахматчига топширдик. Ниҳални 6-турда мағлуб этиб, катта шов-шув кўтарган Муҳиддин Мадаминов (2552) 8-турда оқ доналарда ўйнашига қарамай, франциялик Максим Лагарде (2608)га ютқазиб қўйди. Эронлик гроссмейстер Данишвар Бардия оқ доналарда германиялик Фредерик Свэн (2653) билан муросага келди. Яна бир гроссмейстеримиз Абдималик Абдисалимов (2561) FIDE байроғи остида ўйнаётган россиялик Александр Гришук (2654) билан дурангга рози бўлди. 

Шу тариқа, бугун ўтказиладиган сўнгги 9-тур олдидан ҳиндистонлик Ниҳал Сарин тўртинчи бор ташкил этилган President Cup Masters 2025 чемпионига айланди. Бугун чемпион оқ доналарда Абдималик Абдисалимовга қарши баҳс олиб боради. Муҳиддин Мадаминов ва Шамсиддин Воҳидов 4,5 очко билан иккинчи ҳамда учинчи ўринларни банд этган. Бугун 9-турда Муҳиддин украиналик Юрий Кузубовга, Шамсиддин эса Фредерик Свэнга қарши дона суради.