UFC Fight Night 202 турнирининг барча натижалари + ФОТОГАЛЕРЕЯ

Эътиборингизга UFC Fight Night 202 турнирининг барча натижаларини ҳавола этамиз. Оқшомнинг марказий жангида Ислам Махачев америкалик Бобби Гринни биринчи раунддаёқ техник нокаутга учратди. Бу россиялик аралаш яккакураш устасининг қаторасига қозонган ўнинчи ғалабаси бўлди. 

UFC Fight Night 202 турнирининг муҳимлиги жиҳатидан иккинчи жангида ўрта вазн тоифаси вакили, латвиялик Миша Циркунов бразилиялик Веллингтон Турманга иккинчи раундда техник нокаут билан ютқазди. Бу унинг кетма-кет қабул қилиб олган учинчи мағлубияти бўлди. Аслида Циркунов бугунги жангида Маҳмуд Мурадовга қарши октагонга чиқиши лозим эди. Лекин ҳамюртимиз қўлидан жароҳат олгани учун Мишанинг рақиби ўзгарганди. 

Яна бир россиялик спортчи Арман Царукян испаниялик Йоэль Альваерсни иккинчи раундда худди Ислам каби партердаги жавобсиз зарбалар эвазига мағлуб этди. Яримоғир вазнда AMC Fight Nights промоушени чемпиони Армен Петросян ҳакамларнинг қарори билан Грегори Родригесдан устун келди.

Шунингдек, бугунги оқшомда Игнасио Бахамондес, Террэнс МакКинни, Рамиз Брахимай, Присцила Кечоейра, Жосиэн Нунес, Жонатан Мартинез ва Карлос Эрнандес навбатдаги ғалабаларини тантана қилишди.