15 май 11:18
Янгиликлар

Бокс/ММА

Сергей Ковалёв иштирокидаги жанг тўлиқ давом этди

Хабар берганимиздек, бугун тонгда АҚШнинг Калифорния штати Лос-Анжелес шаҳрида профессионал бокс кечаси бўлиб ўтди.

Инглвуддаги "Forum Stadium"да ўтган оқшомнинг марказий жангида россиялик Сергей Ковалёв болгариялик Тервел Пулевга қарши рингга кўтарилди. Ўн раунд тўлиқ давом этган жанг ғолиби очколар ҳисобига кўра аниқланди.

Жангда Ковалёв ҳакамларнинг якдил қарори билан 98-92, 98-92, 97-93 ҳисобида ғалаба қозонди. Бу россиялик чарм қўлқоп устасининг биринчи оғир вазн тоифасидаги дебют жанги эди. У сўнгги жангини 2019 йилнинг ноябрь ойида Сауль Канело Альваресга қарши ўтказиб, мағлуб бўлган эди.

Маълумот учун, Сергей Ковалёв проф боксда 40 та жанг ўтказган. Ҳисобида 35 ғалаба, 4 мағлубият ва 1 дуранг бор. Пулев эса бугун фаолиятидаги илк мағлубиятини қабул қилиб олди. Унинг рекорди 16 ғалаба (13 нокаут) эди.