Канело Мессини жазолашга қарор қилди. Нима учун Лео Мексика байроғига ҳурматсизлик қилди?

Мусобақада майдондан ташқари кескин можаролар бўлиб ўтмоқда. Аргентина терма жамоасининг асосий юлдузи Лионель Месси Мексика терма жамоаси билан муваффақиятли ўйиндан сўнг (2:0) кутилмаганда кўплаб мексикаликларнинг, шу жумладан таниқли боксчи ва супер ўрта вазнда мутлақ жаҳон чемпиони Сауль Альвареснинг ғазабига сабаб бўлди.

Гап Месси ажойиб ўйин ўтказгани ҳақида эмас. Муаммо Лионель ғалаба қозонганидан кейин кийиниш хонасида ўзини тутишида бўлди. Оммавий ахборот воситаларида Мессининг ерда ётган Мексика терма жамоаси футболкасини оёғи билан босиб олган видеоси тарқалиб кетди. Бу даражадаги ҳурматсизлик Аргентина терма жамоаси ҳужумчисини танқид қилган Сауль Альвареснинг кескин норозилигига сабаб бўлди. 

"Месси мен билан учрашиб қолмаслик учун Яратганга илтижо қилсин! Мессининг футболка ва байроғимиз билан пол артаётганини кўрдингизми? Аргентина Мексикани ҳурмат қилган бўлса, биз ҳам Аргентинани шундай ҳурмат қилишимиз керак! Мен Аргентина ҳақида гапирмаяпман, Месси ва унинг қилган ишлари ҳақида гапиряпман. Мексика футболкаси полда экан, бу биз учун ҳақорат", - деб ёзади Альварес ижтимоий тармоқларда.

Албатта, Канело айтган ишларини амалда Мессига қилиши ҳақиқатдан бироз узоқ. Мексикалик боксчи анча жаҳлдор, лекин айни пайтда у жуда ақлли йигит ҳам. У афсонавий футболчига ҳужум қилса, нима бўлишини яхши тушунади. Бироқ, Канелони ҳурмат қилсак арзийди. У ҳар доим ўз мамлакатини ҳимоя қилишга тайёр ва ўзига нисбатан ҳар қандай адолатсизликка жиддий муносабат билдиради. Бошқа томондан, Альварес ортиқча ҳиссиётга берилган бўлиши мумкин. Балки, Месси ҳеч кимни хафа қилишни хоҳламагандир. Ғалабадан сўнг хурсандчилик пайтида у футболкани бехосдан босган бўлиши мумкин.

Шунингдек, Серхио Агуэро ва Сеск Фабрегас аллақачон Мессини ёнини олиб чиқишган. Улар кийиниш хоналарида баъзида нима содир бўлишини жуда яхши биладиган икки ажойиб футболчи ҳисобланади.

"Жаноб Канело, узр сўрайдиган ҳеч нарса кўрмаяпман, лекин сиз футбол кийим алмаштириш хоналарида нима содир бўлишини аниқ билмайсиз. Футболкалар ўйиндан кейин доимо ерда ётади. Агар яхшилаб эътибор бериб қарасангиз Месси бутсасини ечмоқчи бўлиб, тасодифан формага босиб кетганини кўришингиз мумкин", - деб ёзади Агуэро ижтимоий тармоқларда.

"Сен уни танимайсан ва ўйиндан кейин кийиниш хонасида нима бўлишини билмайсан. Барча футболкалар, ҳатто биз кийган футболкалар ҳам полга ташланади. Шундан сўнг улар ювилади. Ҳаттоки муҳим ғалабани нишонлаётганингда ҳам шундай бўлади", - деди Фабрегас.

Хўш! Сиз футболчиларнинг фикрига қўшиласизми?