Абдусатторов Руминия турниридаги иккинчи учрашувини ўтказди

Ўз ичига 5 та турнирни жамловчи ушбу нуфузли шахмат мусобақасининг умумий мукофот жамғармаси 1,5 миллион АҚШ долларини ташкил этади. Мазкур мусобақада ҳамюртимиз Нодирбек Абдусатторов (2766) ҳам ўз маҳоратини намойиш этмоқда. Биринчи турда оқ доналарда ҳиндистонлик Рамешбабу Праггнанандҳа (2747) билан дурангга имзо чеккан гроссмейстеримиз 2-турда қора доналарда франциялик Алиреза Фирузджага имкониятни бой бериб қўйди. 

Биринчи турда ғалабага эришган америкалик Фабиано Каруана ҳамда ҳиндистонлик Доммаражу Гукеш бу турда дуранг қайд этишди. Каруана ватандоши Уэсли Со, Гукеш эса FIDE байроғи остида ўйнаётган Ян Непомняший билан муросага келди. Иккинчи турда биргина ғалаба қайд этилиб, у ҳам бўлса Абдусатторов партиясида кузатилди. 

Маълумот учун, "Superbet Chess Classic Romania" турнирининг мукофот жамғармаси 350 000 АҚШ долларини ташкил қилади. Чемпион гроссмейстер 100 000 долларни қўлга киритади. Ҳозирча Нодирбекнинг ишлари яхши эмас. У 0,5 очко билан охиридан битта олдинга ўринни эгаллаб турибди. Лекин битта ғалаба вазиятни бутунлай ўзгартириб юборади. Турнир жадвалида 1,5 тадан очкога эга Каруана ва Гукеш пешқадамлик қиляпти. 

Турнир иштирокчилари: Фабиано Каруана (АҚШ, 2805), Ян Непомнящий (FIDE, 2770), Нодирбек Абдусатторов  (Ўзбекистон, 2766), Доммаражу Гукеш (Ҳиндистон, 2763), Уэсли Со (АҚШ, 2757), Рамешбабу Прагнанандха (Ҳиндистон, 2747), Аниш Гири (Нидерландия, 2745), Алиреза Фирузджа (Франция, 2737), Максим Вашье-Лаграв (Франция, 2732), Богдан-Даньел Дяк (Руминия, 2680).

2-тур натижалари: Фирузджа – Абдусатторов 1-0, Каруана – Со, Непомняiий – Гукеш, Прагнанандха – Вашье-Лаграв, Дяк – Гири партияларида дуранг қайд этилди.