Абу-Даби "Катта Дубулға". Бахтиёров бронза, Тиловов олтин медаль учун татамига чиқади

Сайёрамизнинг 5 қитъаси 77 давлатидан жами 450 (277 эркак, 173 аёл) нафар дзюдочи иштирок этаётган мусобақада Ўзбекистон терма жамоаси вакиллари ҳам медаллар ва Париж-2024 Олимпиадаси йўлидаги қимматли рейтинг очколари учун баҳсларга киришишди. 

Бугунги илк кунги саралаш беллашувларидан сўнг икки дзюдочимизнинг кечки дастурда медаллар учун татамига чиқиши маълум бўлди. -60 кг вазнда курашган Камолиддин Бахтиёров 1/4 финалда франциялик Седрол Револга ютқазиб қўйди. Ўтиш учрашувида қозоғистонлик Магжан Шамшадиндан устун келди. Энди у бронза медали учун россиялик Аюб Блиевга қарши баҳс олиб боради. 

Қувонарлиси, -66 кг вазнда курашаётган Муҳриддин Тиловов финалга етиб келди. У иккинчи босқичда туркманистонлик Сердар Раҳимовни, учинчи даврада саудиялик Мунис Ҳавсавини, 1/4 финалда БАА вакили Нармандаҳ Баянмунҳни, 1/2 финалда эса мўғулистонлик Эрхембаяр Баттогтоҳни мағлубиятга учратди. Тилововнинг олтин медаль учун кечадиган финал беллашувидаги рақиби, Токио Олимпиадасининг кумуш медали совриндори, грузиялик Важа Маргвелашвили бўлади.