Abu Dhabi Chess Festival 2024. Нодирбек Якуббоев 3-турдан сўнг юз фоизлик натижа билан пешқадам!

Мукофот жамғармаси 63 600 АҚШ долларини ташкил этувчи Abu Dhabi Chess Festival 2024 турнирининг "Masters" гуруҳида 11 нафар шахматчимиз ҳам ўз имкониятини синовдан ўтказяпти.  

Қувонарлиси, ортда қолган 3-турдан сўнг Нодирбек Якуббоев (2655) юз фоизлик натижа билан мусобақада пешқадамлик қиляпти. Фақат икки нафар иштирокчи 3 та партиянинг барчасида ғалаба қозонган. FIDE байроғи остида ўйнаётган Володар Мурзин ҳам Нодирбек сингари 3 очкога эга. У қўшимча кўрсаткичларга кўра иккинчи ўринни эгаллаб турибди. Бугун 4-турда айнан икки пешқадам ўзаро дона суришади. 

Якуббоев 3-турда қора доналарда ўйнашига қарамай, ҳиндистонлик Ҳарикришанни мағлубиятга учратди. Уч имкониятдан 2,5 очко жамғарган Жавоҳир Синдаров (2674) оқ доналарда италиялик Альберто Барп (2452)дан устун келди. 

Халқаро мастеримиз Баҳром Бахриллаев (2344) қора доналарда ҳаракат қилганига қарамай, рейтингда ўзидан юқорида бораётган колумбиялик гроссмейстер Хосе Кардосо (2507)ни таслим этди. Бахриллаев 2,5 очко билан қўшимча кўрсаткичларга кўра 11-ўриндан жой олган. Учинчи поғонада бораётган эронлик гроссмейстер Амин Табатайи (2712) ҳисобида ҳам 2,5 очко бор. Жами 36 нафар шахматчи 2,5 очкодан жамғарган.  

 "Мастерс" гуруҳида қатнашаётган шахматчиларимиздан Шамсиддин Воҳидов (2643) ҳам ғалабага эришди. Ёш гроссмейстеримиз қора доналарда ҳиндистонлик Ажай Сантошни енгди. Бу турда Ортиқ Ниғматов, Абдималик Абдисалимов ва Афруза Ҳамдамова рақиблари билан дуранг ўйнайшди. Муҳиддин Мадаминов, Муҳаммадзоҳид Суяров, Саидакбар Сайдалиев ва Ҳумоюн Бегмуратов имкониятни бой беришди.