Abu Dhabi Chess Festival 2024. Тўрт нафар шахматчимиз етакчилар сафида

Мукофот жамғармаси 63 600 АҚШ долларини ташкил этувчи Abu Dhabi Chess Festival 2024 турнирининг "Masters" гуруҳида 11 нафар шахматчимиз ҳам ўз имкониятини синовдан ўтказяпти. Ортда қолган 5-турда пешқадамлар сафида бораётган ва ҳали мағлубиятга учрамаган Нодирбек Якуббоев (2655) ва Жавоҳир Синдаров (2674) ўз рақиблари билан дуранг ўйнашди. 

Ҳар икки гроссмейстеримиз ҳам бу турда ҳиндистонлик шахматчиларга қарша қора доналарда ҳаракат қилишди. Синдаров Пранав (2598), Якуббоев эса Субраманиям Бхарат билан муросага келган. Яна бир гроссмейстеримиз Шамсиддин Воҳидов (2643) қора доналарда филиппинлик Даниэль Куизонни мағлубиятга учратди ва очколарини 4 тага етказиб олди.  

Бешинчи турда шахматчиларимиздан Абдумалик Абдусалимов ва Муҳиддин Мадаминов ҳам ғалаба қозонишди. Ортиқ Ниғматов ва Баҳром Бахриллаев рақибларига имкониятни бой беришган бўлса, Муҳаммадзоҳид Суяров, Саидакбар Сайидалиев ва Афруза Ҳамдамова дуранг натижа қайд этишди. 

Бугун ўтказиладиган 5-тур олдидан Нодирбек Якуббоев, Жавоҳир Синдаров, Абдумалик Абдусалимов ва Шамсиддин Воҳидов 4 очкодан жамғаришган. Қўшимча кўрсаткичларга кўра энг яхши натижа қайд этиб турган Нодирбек турнир жадвалида 4-ўриндан жой олган. Синдаров 9, Абдусалимов 14, Воҳидов эса 16-поғонани банд этган. Кучли учликдан жой олган Володар Мурзин, Дэвид Паравян ва Луке Мендонка ҳисобида 4,5 тадан очко бор.

Эътиборга молик жиҳати шундаки, бугун ўтказиладиган 6-турда ўзбек дербисига гувоҳ бўламиз. Тўрттадан очкога эга Нодирбек Якуббоев ва Абдумалик Абдусалимов ўзаро партияда муносабатларига ойдинлик киритиб олишади. Жавоҳир Синдаров қора доналарда ўзи сингари 4 очкога эга сингапурлик Тин Жин Гяога қарши баҳс олиб боради.