Адҳам Икрамов жаҳон чемпионатига йўл олаётган дзюдочиларимизга оқ фотиҳа берди + ФОТОГАЛЕРЕЯ

Бироз аввал Ўзбекистон дзюдо федерациясида сафар олдидан турган дзюдочиларимиз билан учрашув ташкил этилди. 

Унда Ўзбекистон Республикаси Спорт вазири Адҳам Икрамов, Миллий олимпия қўмитаси бош котиби Ойбек Касимов, МОҚ раиси ўринбосари, мамлакат дзюдо федерацияси раиси Азизжон Камилов, раис ўринбосарлари Зафар Қаҳрамонов, Атабек Исмаилов ва бошқа мутасаддилар терма жамоамиз аъзолари билан учрашишди ҳамда дилдан суҳбатлашишди. 

Спорт вазири ҳатто Давлат Бобонов билан "отжимание" қилиш бўйича беллашиб ҳам кўрди. Албатта, вазир томонидан бундай шахсий намунанинг кўрсатилиши дзюдочиларни янада ғалабалар сари руҳлантиради. Ўз ўрнида Ойбек Касимов Париж-2024 Олимпиадаси олдидан ўтказиладиган ушбу жаҳон чемпионатининг аҳамияти ҳақида гапириб, дзюдочиларимизга омад тилади. 

Учрашув сўнггида Адҳам Икрамов дуога қўл очиб, дзюдочиларимизга Абу-Даби татамиларида ғалаба ва омад ёр бўлишига фотиҳа берди. Халқимизда "олтин олма, дуо ол, дуо олтин эмасму" деган ҳикмат бор. Биз ҳам ўз ўрнида масъулиятли сафар олдидан турган дзюдочиларимиз, мураббийларимиз, шифокорларимизга зафар ёр бўлишини тилаймиз. 

Эслатиб ўтамиз, ўтган йили Қатар пойтахти Доҳа шаҳрида ўтган жаҳон чемпионатида Ўзбекистон терма жамоаси 2 та кумуш, 2 та бронза медалини қўлга киритиб, тарихдаги энг натижани қайд этганди.