Адҳам Очиловни табриклаймиз!

Адҳам Очилов - 1976 йилнинг 7 апрель куни Тошкент шаҳрида дунёга келган. Болалигидан эркин курашга ошно тутинган бугунги қаҳрамонимиз фаолияти давомида катта ютуқларга эришди. 1995 йили Тошкент шаҳрида ўтказилган Марказий Осиё ўйинларининг кумуш медали соҳиби бўлди. Бу унинг халқаро майдондаги биринчи катта ютуғи эди. 

1996 йилда Хитойнинг Сяошань шаҳрида бўлиб ўтган Осиё чемпионатида барча рақибларини мағлубиятга учратиб, олтин медални қўлга киритди. 1999 йили Туркия пойтахти Анқара шаҳрида ўтган жаҳон чемпионатида кумуш медалга эга чиқди. Ўша йили Тошкент мезбонлигида ўтган Осиё чемпионатида бронза медали билан тақдирланди. 2000 йили Гуйлинда яна бир бор шоҳсупанинг учинчи поғонасига кўтарилди. 2004 йил Теҳронда ўтган қитъа чемпионатида икки карра Осиё чемпиони деган номга сазовор бўлди.

Адҳам Очиловнинг спортдаги эришган муваффақиятлари давлатимиз томонидан муносиб тақдирланган. 1996 йилда "Шуҳрат" медали, 2000 йилда эса Ўзбекистон Республикасида хизмат кўрсатган спортчи унвонлари билан мукофотланган.

Фурсатдан фойдаланиб, Адҳам Очиловни бугунги унутилмас кун билан муборакбод этамиз. Адҳам ака, фарзандларингиз, оила аъзоларингиз бахтига ҳамиша соғ-саломат бўлинг.