Афруза Ҳамдамовада яна ғалаба, уни жаҳон чемпионлигидан ярим очко ажратиб турибди

Дунё биринчилигининг 16 ёшгача бўлган қизлар мусобақасида Афруза Ҳамдамова муваффақиятли одимламоқда. Ҳамюртимиз 9-турда FIDE байроғи остида ўйнаётган Яна Жаповани оқ доналарда мағлубиятга учратиб, ўз очколарини 8,5 тага етказиб олди. 

Ҳамдамова 9 та учрашувдан фақат биттасида дуранг ўйнаб, қолган барча партияларда зафар қучди. Олдинда яна иккита тур бор. Афрузанинг энг яқин таъқибчиси яна бир FIDE байроғи остидаги Лейла Табермакова 7 очкога эга бўлиб турибди. Шахматчимиз 8-турда қора доналарда ўйнашига қарамай, Табермаковани таслим этганди. Бугун ватандошимиз 10-турда ҳиндистонлик Мриттика Маликка қарши қора доналарда ўйнайди ва дуранг ҳам уни жаҳон чемпионига айлантиради. Афруза Ҳамдамова ўтган йили Италияда 14 ёшгача шахматчилар ўртасида ҳам жаҳон чемпиони бўлган эди. 

Бразилиялидаги жаҳон чемпионатининг 14 ёшгача ўғил болалар мусобақасида қатнашаётган Жавоҳир Бозоров 6 очко билан қўшимча кўрсаткичларга кўра 20-ўринни эгаллаб турибди. У 9-турда АҚШ вакили Велант Талвалкардан устун келди. Бугун у 10-турда қора доналар FIDE байроғи остида ўйнаётган Алексей Прохоровга қарши баҳс олиб боради. Бу ёш тоифасида қозоғистонлик Эдгар Мамедов 7,5 очко билан якка пешқадам бўлиб турибди.   

Қувонарлиси, 14 ёшгача қизлар мусобақасида муваффақиятли тарзда иштирок этаётган Нилуфархон Имомқўзиева жаҳон чемпионати медалларидан бирини қўлга киритишга жуда яқин турибди. Шахматчимиз 9-турда қора доналарда ўйнашига қарамай, франциялик Эмили Негрени мағлуб этди. Нилуфар 7 очко билан қўшимча кўрсаткичларга кўра 2-ўринни банд этган. Пешқадам Диана Ҳафизова (FIDE) ҳисобида 8 очко бор. Ҳамюртимиз 8-турда айнан Дианага ютқазиб қўйганди. Бугун Имомқўзиева 10-турда қора доналарда Оксана Горячкина (FIDE)га қарши баҳс олиб боради.