Аҳролжон Рўзиевни табриклаймиз!

Аҳролжон Рўзиев 1957 йил 16 декабрь куни Тошкент шаҳрида дунёга келган. Ўз умрини спорт курашларига бахшида этган ҳамюртимиз бугунга келиб узоқ йиллик машаққатли меҳнатларининг самарасини кўрмоқда. Педагогика фанлари доктори, профессор Аҳролжон Рўзиев айни пайтда Бирлашган Кураш дунёси вице-президенти лавозимида фаолият олиб бормоқда. Спорт курашлари бўйича терма жамоамизнинг бугунги кунда жаҳоннинг энг етакчи жамоаларидан бирига айланишида, полвонларимиз қўлга киритаётган натижаларда Аҳролжон Аҳмедовичнинг хизмати беқиёс. 

Маълумот учун, Аҳролжон Рўзиев 2007-2016 йиллар Ўзбекистон Давлат жисмоний тарбия институтида спорт ўйинлари ва миллий спорт турлари бўйича кафедра профессори, 2008-2014 йилларда FILA ижроқўм аъзоси бўлган. Фаолияти давомида "Ўзбекистон Республикасида  хизмат кўрсатган спорт устози" (2001), иккинчи даражали "Соғлом авлод учун" (1999) ва "Фидокорона хизматлари учун" (2004), Қозоғистоннинг юқори даражадаги "Чингизхон" орденлари, "Ўзбекистон спорт фахрийси" кўкрак нишон билан тақдирланган.

Фурсатдан фойдаланиб, Аҳролжон Аҳмедовичга узоқ умр, сиҳат-саломатлик, оилавий бахт, фарзандлар, набиралар роҳатини кўриб юришларини тилаймиз.