16 июл 11:40
Янгиликлар

Бокс/ММА

AIBA Рио-2016 Олимпиадаси ҳакамларини четлатди, улар орасида ҳамюртимиз ҳам бор

Халқаро ҳаваскор боксчилар ассоциацияси (AIBA) Рио-2016 Олимпиадасининг бокс баҳсларида ишлаган барча 36 нафар ҳакамни четлатиш ҳақида қарор қабул қилди.

“AIBA 36 нафар ҳакамнинг барчасини четлатди. Ҳозирча уларнинг қанча муддатга бокс ҳакамлигидан четлатилгани аниқ эмас”, - дейилади ташкилот томонидан тақдим этилган меъёрий ҳужжатда.

Эслатиб ўтамиз, Рио-де-Жанейро шаҳрида ўтган Олимпиаданинг бокс мусобақаси ҳакамлари бир неча бор эътироз ва танқидга учраган эди. Айрим ҳакамлар мусобақа давом этаётган пайтдаёқ четлатилганди. Олимпиада якунланганидан кейин AIBA ҳакамлик тизимини ўзгартириш ҳақида бош қотира бошлаган эди.

Маълумот учун, Рио Олимпиадасида ўзбекистонлик ҳакамлардан AIBA рефериси Жасур Қурбонов ҳам иштирок этган ва жангларни бошқарган эди. Ўтган йили эса ташкилот президенти Чинг-Куо Ву ўз лавозимидан истеъфо берганди. Айни пайтда AIBA президенти вазифасини ҳамюртимиз Ғофур Раҳимов бажармоқда.