Ажойиб! Екатерина Гейниш ва Дмитрий Чигирев Канададаги муваффақиятдан сўнг Франция Гран-присида ҳам иштирок этади

Спортчиларимиз Франциядадаги Гран-при босқичида иштирок этишади. Ушбу мусобақа 1-3 ноябрь кунлари Анже шаҳрида ташкил этилади.

Гейниш ва Чигирев иштирокидаги қисқа дастур 1 ноябрь куни Тошкент вақти билан соат 23:45 да бошланади. Эркин дастур эса 2 ноябрь куни соат 23:40 да старт олади.

Шунингдек, вакилларимизнинг 3 ноябрь куни соат 18:30 да кўргазмали дастурда ҳам иштирок этиши режалаштирилган.

Франциядаги мусобақа Гран-при сериясининг учинчи босқичи ҳисобланади. Гейниш ва Чигирев 26-27 октябрь кунлари Канаданинг Галифакс шаҳрида ўтказилган иккинчи босқичда кумуш медалга эга чиққан эди.

Маълумот ўрнида, фигулари учиш спорт турида Гран-прилар — бу жаҳондаги энг яхши фигурали учувчилар ўртасида ўтказиладиган йиллик мусобақалар тўпламидир. Улар 6 босқичдан иборат бўлади. Ҳар бир босқичда спортчилар учун эгаллаган ўринларига қараб, 3 баллдан 15 баллгача берилади. Олти босқич якунига кўра, энг яхши 6 нафар спортчи ёки жуфтлик финал босқичида иштирок этади.