Ажойиб! Гейниш ва Чигирев Канада Гран-присига йўлланма олди!

Улар Канададаги Гран-при босқичига квота олишди. Мусобақа 25-27 октябрь кунлари Янги Шотландия провинциясининг Галифакс шаҳрида ташкил этилади.

Маълумот ўрнида, фигулари учиш спорт турида Гран-прилар — бу жаҳондаги энг яхши фигурали учувчилар ўртасида ўтказиладиган йиллик мусобақалар тўпламидир. Улар 6 босқичдан иборат бўлади. Ҳар бир босқичда спортчилар учун эгаллаган ўринларига қараб, 3 баллдан 15 баллгача берилади. Олти босқич якунига кўра, энг яхши 6 нафар спортчи ёки жуфтлик финал босқичида иштирок этади.

Канада Гран-приси сериянинг иккинчи босқичи ҳисобланади. У Гейниш ва Чигирев жуфтлиги учун ҳам дебют Гран-при бўлади. Бу босқичда 7 мамлакатнинг 8 жуфтлиги иштирок этади.

Эслатиб ўтамиз, Екатерина Гейниш ва Дмитрий Чигирев жуфтлиги сентябрь ойида Ўзбекистон терма жамоаси учун ўзларининг илк мусобақасида — "Челленжер" туркумидаги "John Nicks Pairs Challenge International" турнирида қатнашиб, учинчи ўринни эгаллашган эди.