05 сен 08:54
Янгиликлар

Қишки спорт турлари

Ажойиб старт! Фигурали учувчиларимиз Гейниш ва Чигирев АҚШдаги мусобақада бронза медалларига эга чиқишди

Фигурали учиш бўйича Ўзбекистон терма жамоаси аъзолари Екатерина Гейниш ҳамда Дмитрий Чигирев янги мавсумдаги илк халқаро мусобақасида иштирок этди.

Улар АҚШнинг Нью-Йорк шаҳрида ташкил этилган "Челленжер" туркумидаги "John Nicks Pairs Challenge International" жуфтлик мусобақасида чиқиш қилди.

Дастлаб, кеча тонгда қисқа дастур ўтказилди. Унда Гейниш ва Чигирев 64.62 балл билан иккинчи ўринни эгаллашди. Тунда ўтказилган эркин дастурда эса спортчиларимиз 112.34 балл жамрағиб, бешинчи натижани қайд этишди.

Аҳамиятлиси, умумий жадвалда Екатерина ва Дмитрийнинг очколари сони 176.96 ни ташкил этиб, ҳамюртларимиз мусобақада учинчи ўринни эгаллашди. Мусобақа ғолиблиги америкаликлар Элли Кэм ва Дэнни О'Шига (191.62) насиб этди. Иккинчи ўринни эса асли россиялик бўлиб, АҚШ шарафини ҳимоя қилаётган жуфтлик — Алиса Ефимова ҳамда Миша Митрофанов эгаллади (188.88).

"John Nicks Pairs Challenge International" мусобақасида 9 та давлатнинг жами 15 жуфтлиги иштирок этди. Бу жуфтлик дастурида иштирок этадиган фигурали учувчиларнинг жорий мавсум ҳисобидан илк турнири бўлди.

Эндиликда Гейниш ва Чигирев 19-21 сентябрь кунлари Германиянинг Оберстдорф шаҳрида ўтказиладиган "Nebelhorn Trophy" мусобақасида ғолиблик учун кураш олиб боради.