Академик эшкак эшувчиларимиз Кореядаги қитъа биринчилигини муваффақиятли якунлашди

Мусобақанинг сўнгги кун баҳсларида бир қатор экипажларимиз совриндорлар қаторидан жой олишди.

Жумладан, М4х қайиғидаги квартетимиз марра чизиғини биринчи бўлиб кесиб ўтди ва қитъада тенгсиз эканлигини намойиш қилди. Шунингдек, МС-2 йўналишида Алишер Турдиев ҳамда Сардор Тўлқинхўжаев кумуш медаль билан тақдирланган бўлса, енгил вазнли қайиқда кечган яккалик пойгасида Собир Сафаралиев ҳам жамоамиз ҳисобига яна бир кумуш медални тақдим қилди.

Квартетда Осиё чемпионлигини қўлга киритган вакилларимиз таркиби қуйидагича: Давржон Давронов, Абдулло Муҳаммадалиев, Меҳрож Маматқулов, Шаҳбоз Холмурзаев. 

Мусобақа доирасида кечган пара-атлетлар ўртасидаги микст йўналишида юртдошларимиз ҳам делегациямиз ғазнасига олтин медални қўшиб қўйишган. Шу тариқа пара-атлетларимиз билан ҳисоблаганда Ўзбекистон терма жамоаси Осиё чемпионатини 3 та олтин ва 4 та кумуш медаллари билан якунлади.