Aktobe Open 2024. Шахматчиларимиз 7-турда қандай натижа қайд этишди?

Мукофот жамғармаси 100 000 АҚШ долларини ташкил этувчи Aktobe Open 2024 турнири анъанавий тарзда Владимир Дворкович хотирасига бағишлаб ўтказиб келиняпти. Дунёнинг кўзга кўринган гроссмейстерлари қаторида уч нафар шахматчимиз Нодирбек Якуббоев (2665), Муҳаммадзоҳид Суяров (2429) ва Муҳиддин Мадаминов (2504) ҳам совринли ўринлар учун дона сурмоқда.  

Мусобақанинг 7-турида уччала вакилимиз ҳам қора доналарда ҳаракат қилиши керак эди. Аммо Мадаминов бизга маълум бўлмаган сабабга кўра қозоғистонлик Ораш Шоназаровга қарши баҳс олиб бормади ва унга техник мағлубият ёзилди. Шахматчиларимиз орасида энг яхши натижа кўрсатаётган Нодирбек Якуббоев австриялик Валентин Байдецкий (2482) билан муросага келди. Суяров мезбон шахматчи Ергали Сулеймен (2254) билан дуранг ўйнади. 

Бугун ўтказиладиган 8-тур олдидан турнир жадвалида пешқадам ўзгарди. Еттинчи турда шу кунгача пешқадам бўлиб келган Абҳижит Гуптани мағлуб этган Парҳам Мақсудлу (Эрон) 6 очко билан якка карвонбоши бўлиб олди. Алексей Сарана (Сербия, 2706), Шант Саргсян (Арманистон, 2637), Александр Предке (Сербия, 2667), Пураник Абҳиманю (Ҳиндистон, 2629) 5,5 тадан очко жамғариб, кейинги ўринларни банд этишган. Беш очкога эга Нодирбек Якуббоев қўшимча кўрсаткичларга кўра 9-поғонадан жой олган. Олтинчи ўриндаги ҳиндистонлик гроссмейстер Абҳижит Гуптада ҳам 5 очко бор. 

Муҳаммадзоҳид Суяров 7-турдан кейин 3,5, Муҳиддин Мадаминов эса 2,5 очкога эга. Улар қўшимча кўрсаткичларга кўра, мос равишда 41 ва 68-ўринларни банд этишган. Муҳиддин учун мусобақа эрта якунланганини айтиш жоиз. Бугун ўтказиладиган 8-турда шахматчиларимиз рақибларига қарши оқ доналарда ҳаракат қилишади.        

Aktobe Open 2024. 8-тур жуфтликлари:

Нодирбек Якуббоев (2665) - Михаил Никитенко (Беларусь, 2525)  

Муҳаммадзоҳид Суяров (2429) - Сауат Нургалиев (Қозоғистон, 2320)

Маълумот учун, Aktobe Open 2024 турнири ғолиби 20 000 доллар мукофот пулига эга бўлади. Иккинчи ўрин соҳиби 15 600, учинчи ўрин эгаси эса 11 100 АҚШ долларини қўлга киритади.