Ал аш-Шайх “Канело” Ар-Риёдда жанг қилишга тайёрлигини маълум қилди

Унинг рақиби WBC йўналиши бўйича иккинчи ўрта вазн тоифасидаги чемпион Кристиан Мбилли бўлади. Яқинда Ал аш-Шайх ушбу бокс оқшомининг кўламли андеркатини (асосий жанг олдидан бўладиган жанглар) эълон қилганди.

“Канело мен билан боғланиб, нима бўлишидан қатъи назар, Ар-Риёдда жанг қилишини айтди. У ҳеч нарсадан қўрқмайди, — деб ёзди Ал аш-Шайх ижтимоий тармоқларда. — Менинг ватаним — икки муқаддас масжид уйи, тинчлик, хотиржамлик, бой цивилизация, чуқур тарих ва бағрикенг инсонлар заминидир... Муносабат билдирган ва қўллаб-қувватлаган барчага раҳмат. Оғир дамлар ҳақиқий дўстларни юзага чиқаради”.

Ушбу жангнинг 31 октябрга кўчирилгани анча олдин маълум бўлган эди, бироқ бу яқиндагина расман тасдиқланди. Саудия Арабистони ва ҳусийлар ўртасида давом этаётган можаролар сабабли ушбу шоу бекор қилиниши ёки бошқа мамлакатга кўчирилиши мумкинлиги ҳақидаги шубҳаларни ҳатто ушбу расмий эълон ҳам йўққа чиқармади.

Яқинда ҳусийлар Ар-Риёд халқаро аэропортига қилинган ҳужум учун жавобгар эканини ўз зиммаларига олишди, бу эса унинг ёпилишига, рейсларнинг бекор қилинишига ва сайёҳларга Саудия Арабистонига сафар қилишдан тийилиш бўйича тавсиялар берилишига олиб келди.