"Ал-Беруний" халқаро турнирида 2-тур учрашувлари ўтказилди (барча натижалар)

Умумий мукофот жамғармаси 68 700 АҚШ долларини ташкил қилувчи мусобақа уч гуруҳда ўтказилмоқда. "Мастерс" гуруҳида ҳамюртларимиздан энг яхши натижага ҳозирча ёш гроссмейстеримиз Абдумалик Абдусалимов эришмоқда. У бир ғалаба ва бир мағлубият билан 1 очко жамғарган ҳолда 10 иштирокчи орасида 7-ўринни эгаллаб турибди. Абдусалимов 2-турда қора доналарда венгриялик Санан Сюгировга имкониятни бой берди. Ортиқ Ниғматов арманистонлик Ҳайк Мартиросяндан енгилди. Муҳиддин Мадаминов хитойлик Ма Кюн билан муросага келди. Афруза Ҳамдамова россиялик Владислав Артемьев билан дуранг ўйнади. Рапид бўйича амалдаги жаҳон чемпиони россиялик Володар Мурзин арманистонлик Шант Саргсянга ютқазиб қўйди.

"Челленжер" гуруҳида қатнашаётган шахматчиларимиздан бу турда ҳам ҳеч ким ғалаба қозона олмади. Саидакбар Сайдалиев россиялик Иван Землянский билан, Алмас Раҳматуллаев қозоғистонлик Ринат Жумабаев билан дуранг қайд этди. Ҳумоюн Бегмуратов оқ доналарда Дэвид Паранянга Муҳаммадзоҳид Суяров Арсений Нестеровга ютқазиб қўйди. 

"Фьючерс" гуруҳида рейтинги 2400 ва ундан юқори 6 нафар хорижлик шахматчи қатнашяпти. Умида Омонова ушбу гуруҳнинг биринчи рақамли иштирокчиси россиялик Клементи Сичев (2542) билан дурангга эришганди. Бу сафар у қора доналарда ўйнашига қарамай, украиналик гроссмейстер Виталий Бернардский билан муросага келди. Асрорбек Омонов туркманистонлик Сапармират Атабаев билан дуранг қайд этди. Нилуфар Якуббаева ва Гулдона Каримова бу турда мағлубтият аламини тотиб кўришди.