"Ал-Беруний" халқаро турнирининг биринчи турида қандай натижалар қайд этилди?

Умумий мукофот жамғармаси 68 700 АҚШ долларини ташкил қилувчи мусобақа уч гуруҳда ўтказилмоқда. "Мастерс" гуруҳида ҳамюртларимиз билан бирга рейтинги 2600 ва ундан юқори бўлган 6 нафар хорижлик шахматчи ҳам бош соврин учун баҳсларга киришди. Гроссмейстеримиз Абдумалик Абдусалимов ўзига хос ўзбек дербисида Ортиқ Ниғматовни мағлубиятга учратди. 

Муҳиддин Мадаминов арманистонлик Шант Саргсянга, Афруза Ҳамдамова яна бир арман гроссмейстери Ҳаик Мартиросянга имкониятни бой берди. Рапид бўйича амалдаги жаҳон чемпиони россиялик Володар Мурзин венгриялик Санан Сюгировдан устун келди. Россиялик Владислав Артемьев ва хитойлик Ма Кюн баҳсида дуранг натижа қайд этилди.      

"Челленжер" гуруҳида қатнашаётган шахматчиларимиздан ҳеч бири 1-турда ғалаба қозона олмади. Биргина Ҳумоюн Бегмуратов қора доналарда қозоғистонлик гроссмейстер Ринат Жумабаев билан муросага келди. Алмас Раҳматуллаев эронлик Бардия Данешварга, Муҳаммадзоҳид Суяров Иван Землянскийга, Саидакбар Сайдалиев Дэвид Паранянга ютқазиб қўйди.  

"Фьючерс" гуруҳида рейтинги 2400 ва ундан юқори 6 нафар хорижлик шахматчи қатнашяпти. Умида Омонова ушбу гуруҳнинг биринчи рақамли иштирокчиси россиялик Клементи Сичев (2542) билан дурангга эриша олди. Ўзбек дербисида Асрорбек Омонов аёллар ўртасида гроссмейстер Нилуфар Якуббаевадан устун келди. Гулдона Каримова эса қора доналарда швециялик гроссмейстер Виталий Сивукдан енгилди.