Алекс Перейра янгиланган рейтингда Топ-10`га кириб олди

Икки вазнда собиқ Glory чемпиони Алекс Перейра янгиланган ўрта вазн тоифаси рейтингида 6-ўринга кўтарилиб олди. У якшанба тонгида Лас-Вегас шаҳрида ўтган UFC 276 турнирида Шон Стриклендни нокаутга учратган эди. 

Бразилиялик жангчи ушбу чиройли ғалабаси эвазига чемпионлик камари учун потенциал даъвогарга айланди. Перейра бунга қадар UFC промоушенида Андреас Михайлидисни нокаутга учратган, Бруно Сильвани очколар ҳисобига кўра таслим этганди.

Айнан якшанба тонгидаги UFC турнирида ушбу дивизион чемпиони Исраэль Адесанья даъвогар Жаред Канноньени зерикарли ўтган жангда очколар ҳисоби билан мағлубиятга учратган эди. 

Перейра - Адесанья жангининг амалга ошиши учун етарлича фактлар бор. Энг асосийси, Алекс кикбоксингда икки бор Адесаньяни мағлуб эта олган. Жангларнинг бирида у Исраэлни чуқур нокаутга учратганди.