Александр Волков - Сирил Ган жангининг янги санаси тасдиқланди

Аслида ушбу жанг UFC 308 турнири доирасида ўтказилиши керак эди. Аммо россиялик аралаш яккакураш устасининг жароҳати олиши жангнинг карддан ечилишига сабаб бўлганди. Ташкилотчилар Волков - Ган 2 жанги 7 декабрь куни Лас-Вегасда ташкил этиладиган UFC 310 турнири доирасида ўтказилишини эълон қилишди. 

Катта эҳтимол билан бу чемпионлик камари учун даъвогарлик мақомидаги жанг бўлади. Айни пайтда Ган UFC оғир вазнлилар рейтингида 2, Волков эса 3-ўринни эгаллаб турибди. Бу россиялик аралаш яккакураш устаси учун реванш жангига айланади. 2021 йилнинг июнь ойида ўтказилган илк жангда франциялик спортчи очколар ҳисобига кўра ғалаба қозонганди. 

Маълумот учун, 35 ёшли Александр Волков июнь ойида Ар-Риёдда ўтган UFC on ABC 6 турнирида ватандоши Сергей Павловични очколар ҳисобига кўра таслим этганди. Бу унинг кетма-кет қозонган тўртинчи ғалабаси бўлганди. 34 ёшли Сирил Ган эса роппа-роса бир йилдан бери жанг ўтказмаяпти. У 2023 йилнинг сентябрида Сергей Спивакни иккинчи раундда техник нокаутга учратган эди.