Александр Волковнинг навбатдаги жанги эълон қилинди

Волков 9 май куни Ньюаркада бўлиб ўтадиган рақамли UFC 328 турнирида октагонга қайтади. "Драго"нинг рақиби доминиканлик Вальдо Кортес-Акоста бўлади. Эҳтимолий даъвогарлик жангининг ташкил этилиши ҳақида вазиятга яқин бўлган хабардор манбалар маълум қилди.

2024 йил декабрь ойида Александр Волков ҳакамларнинг айри қарори билан Сирил Ганга баҳсли тарзда ютқазиб, тўртта ғалабадан иборат сериясини тўхтатганди. Ўтган йилнинг октябрь ойида россиялик аралаш яккакураш устаси Жаилтон Алмейдани мағлуб этиб, фаолиятини яна муваффақиятли йўналишга қайтарди.

Вальдо Кортес-Акоста эса ўтган йилнинг август ойида ҳакамларнинг якдил қарори билан бошқа бир рус жангчиси Сергей Павловичга ютқазиб қўйган ва шундан сўнг у кетма-кет учта жангда рақиблари Анте Делия, Шамил Газиев ва Деррик Люисни нокаутга учратган эди.

Айни пайтда Волков ва Кортес-Акоста UFC’нинг оғир вазн тоифаси рейтингида мос равишда иккинчи ва бешинчи поғоналарни эгаллаб турибди.