Алишер Юсупов – Осиё чемпиони! Мусобақани 10 та медаль билан якунладик

Мусобақанинг сўнгги куни Париж-2024 Олимпиадаси совриндори Алишер Юсупов жамоамизга ягона олтин медални тақдим этди. У финал беллашувида Корея Республикаси полвони Ли Сеон Гёбни юко баҳоси эвазига мағлубиятга учратди. Ярим финалда айнан Юсуповга ютқазган яна бир Олимпия ўйинлари совриндори Музаффарбек Тўрабоев бронза медалига сазовор бўлди. У учинчи ўрин учун кечган баҳсда мўғулистонлик Одҳу Тсетсентсенгелдан устун эканини амалда исботлади. 

Шунингдек, бугунги кун дастурида Эрназар Сарсенбаев (-100 кг) тожикистонлик Жаҳонгир Мажидовни, Умида Ниғматова (+78 кг) қозоғистонлик Аида Тоишебековани таслим этди. Ўзига хос ўзбек дербисида эса Барчиной Қодирова жамоадоши Маржона Кўчимовани енгиб, бронза медалига эга чиқди. 

Шу тариқа, Ўзбекистон терма жамоаси 1 та олтин, 3 та кумуш, 6 та бронза, жами 10 та медаль билан Осиё чемпионатининг яккалик баҳсларидаги иштирокини якунлади. Эртага қитъа биринчилигида аралаш жамоавий беллашувлар ўтказилади.