Амалдаги Олимпиада чемпионлари камбэк қилган 6-турда асосий рақибларимиз қандай натижа қайд этишди? (+ФОТО)

Амалдаги Олимпиада чемпиони ҳисобланган Ўзбекистон эркаклар терма жамоаси 6-турда Исроил шахматчиларидан 2,5:1,5 ҳисобида устун келишди. Ёш гроссмейстерларимиз 45-Бутунжаҳон шахмат Олимпиадасининг эртага ўтказиладиган 7-турида таркибида тажрибали шахматчилар жам бўлган Украина терма жамоасига қарши дона суришади.  

Еттинчи тур олдидан 100 фоизлик натижа қайд этган биргина Ҳиндистон қолди. Ҳиндлар 6 та учрашувниг барчасида ғалаба қозонишган. Вьетнам, Хитой ва Эрон терма жамоалари ҳисобида 5 ғалаба ва 1 дуранг бор. Англия ва Грузия ҳам ҳали ютқазмаган. 

Ўзбекистон, Франция, Украина, Арманистон, Венгрия, Сербия, Литва ва Нидерландия терма жамоалари 5 ғалаба ва 1 мағлубият қайд этишган. Ўзбекистон қўшимча кўрсаткичларга кўра 10 очко жамғарганлар орасида энг юқори - 5-ўринни эгаллаб турибди. 

Терма жамоамизнинг асосий рақиблари 6-турда муҳим ғалабаларга эришишди. Фақат Хитой - Вьетнам ва АҚШ - Руминия учрашувларида томонлар 2:2 ҳисобидаги жанговар дурангга имзо чекишди. Ҳиндистон Олимпиада мезбонларини 3:1 ҳисобида енгишди. Эрон Магнус Карлсен бошчилигидаги Норвегия терма жамоасини таслим этди - 2,5:1,5. Озарбайжон бироз кутилмаганда Литвага 1,5:2,5 ҳисобида ютқазиб қўйди.  

Эртага ўтказиладиган 7-турнинг марказий баҳси Ҳиндистон ва Хитой терма жамоалари ўртасида ташкил этилади. 

7-турнинг марказий учрашувлари:

Литва - Венгрия

Эрон - Вьетнам

ЎЗБЕКИСТОН - Украина

Сербия - Нидерландия

Армаснитон - Англия

Франция - Грузия