Амалдаги Олимпиада чемпионлари мағлуб бўлган 4-турда асосий рақибларимиз қандай натижа қайд этишди?

Амалдаги Олимпиада чемпиони ҳисобланган Ўзбекистон эркаклар терма жамоаси кетма-кет учта ғалабадан кейин 4-турда Вьетнамга имкониятни бой берди. Ёш гроссмейстерларимиз 45-Бутунжаҳон шахмат Олимпиадасининг 1-турида Тринидад ва Тобаго, 2-турда Миср, 3-турда эса Хорватияни бир хил 3,5:0,5 ҳисобида мағлубиятга учратишган эди. 

Бешинчи тур олдидан 100 фоизлик натижа қайд этган давлатлар сони 8 тага тушди. Ҳиндистон, Испания, Хитой, Вьетнам, Озарбайжон, Польша, Венгрия ва Украина терма жамоалари 4 та партиянинг барчасида зафар қучган. Ўзбекистон қўшимча кўрсаткичларга кўра 6 очко билан 15-ўринни эгаллаб турибди. 

Терма жамоамизнинг асосий рақиблари ўтган турда муҳим ғалабаларга эришишди. Украина АҚШга илк мағлубиятни тақдим этди - 2,5:1,5. Ҳиндистон терма жамоаси Сербияни 3,5:0,5, Венгрия Италияни 2,5:1,5, Хитой Арманистонни 2,5:1,5, Озарбайжон Черногорияни 3:1, Польша Литвани 2,5:1,5, Испания Швецияни 3,5:1,5 ҳисобида таслим этди. 

Бугун ўтказиладиган 5-турнинг 4 та жуфтлигида 100 фоизлик натижа қайд этган терма жамоалар ўзаро тўқнаш келишади ва табиийки фақат ғалаба қозонган давлатлар сони тенг ярмига камаяди. 

5-турнинг марказий учрашувлари:

Ҳиндистон - Озарбайжон

Украина - Венгрия

Испания - Хитой

Вьетнам - Польша