Андижон вилояти дзюдоси истиқболлари муҳокама қилинди

Ўзбекистон Миллий олимпия қўмитаси раиси ўринбосари, мамлакат дзюдо федерацияси раиси Азизжон Камилов Андижон вилояти дзюдосига раҳбар этиб сайланган Сардорбек Раҳмонов билан ZOOM платформасида ташкил этилган онлайн мулоқотда истиқболли режалар юзасидан фикр алмашди. Сардорбек Раҳмонов Андижон вилояти ҳокимлигининг молия бош бошқармаси бошлиғи лавозимида ҳам фаолият юритади.  

"Андижон вилояти дзюдосида тез орада ўзгаришлар бўлишига ишонамиз. Биз биргаликда вилоят дзюдосини янги босқичга олиб чиқиш учун ҳаракат қиламиз. Ҳали Андижондан ҳам терма жамоага номзод дзюдочилар етишиб чиқади. Бир нарсани унутмайлик, терма жамоанинг кучли бўлиши айнан ҳудудларга боғлиқ. Истеъдодлар ҳамиша бўлган, фақат уларга ўз вақтида эътибор бериб, керакли шароитларни қилиб беришимиз керак", - деди А.Камилов. 

Ўз ўрнида Сардорбек Раҳмонов Андижон вилояти дзюдосини янги босқичга кўтариш учун саъй-ҳаракатлар бошлаб юборилгани, биринчи навбатда моддий-техник базани яхшилаш, дзюдочилар яхши шароитларни яратиш, вилоятда селекция жараёнини кучайтириш, ички мусобақаларни кўпроқ ўтказиш масалаларига эътибор қаратилишини таъкидлади.