Андижонда белбоғли кураш бўйича “Олимпия чўққилари” ғолиблари аниқланди + ФОТО

Жами 9 та вазн тоифасида мамлакатимизнинг 11 та ҳудудидаги олимпия захиралари коллежларида белбоғли кураш йўналишида таҳсил олаётган 92 нафар спортчи-ўқувчилар иштирок этган мазкур чемпионатнинг биринчи кунида дастлаб, очилиш маросими ташкил этилди ва шундан сўнг беллашувларга старт берилди.

Ўзбекистон белбоғли кураш федерацияси ҳакамлар ҳайъати раиси Тошкентбой Яхшибоев бошчилигидаги ҳакамлар гуруҳи икки кун давомида спортчиларнинг ҳар бир чиқишини баҳолаб боришди.

Муросасиз ўтган чемпионатнинг якуний натижаларига кўра, қуйидаги спортчи-ўқувчилар ўз вазн тоифаларида барча рақибларини мағлубиятга учратиб,  ғолибликни тантана қилишди.

38 кг. Акбар Собиржонов (Андижон), 42 кг. Бунёдбек Расулов (Фарғона), 46 кг. Ҳаётбек Камолиддинов (Фарғона), 50 кг. Муслимбек Ўктамжонов (Тошкент ш.), 55 кг. Мадхиддин Фазлиддинов (Наманган), 60 кг. Асадбек Маматалиев (Тошкент ш.), 65 кг. Сухробжон Саидбеков (Сирдарё), 71 кг. Самандар Эгамбердиев (Навоий), +71 кг. Илёсбек Мирзаҳматов (Наманган).

Умумжамоа ҳисобида Тошкент шаҳри биринчи, Наманган вилояти иккинчи ва Фарғона вилояти жамоаси учинчи ўринни банд этишди.

Мусобақа якунига етгач, ғолиб ва совриндорлар диплом ва медаллар билан мукофотланишди.

Илҳом РАҲМОНОВ тайёрлади