Андижонда “Отам, онам ва мен – спортчи оила” мусобақаси ўтказилди ФОТОГАЛЕРЕЯ

Жумладан, Андижонда “Отам, онам ва мен – спортчи оила” оилавий жамоалар ҳамда вилоят ҳокими кубоги учун хотин-қизлар ўртасида волейбол мусобақалари бўлиб ўтди.

Тадбирда мамлакатимизда болалар ва оилавий спортни ривожлантириш, хотин-қизлар ва ёшлар ўртасида спортнинг оммавийлигини ошириш, соғлом турмуш тарзини кенг тарғиб этиш масалаларига алоҳида эътибор қаратилаётгани, шунингдек, ўтказилаётган мазкур мусобақалар спорт билан мунтазам шуғулланувчи оилалар, хотин-қизлар сафини кенгайтириш, уларни қўллаб-қувватлаш ва рағбатлантиришда муҳим аҳамият касб этиши таъкидланди.

“Отам, онам ва мен – спортчи оила” оилавий жамоалар спорт мусобақаси вилоятдаги 880 та маҳалла фуқаролар йиғинида ўтказилиб, 4 мингдан зиёд оилавий жамоалар иштирок этди. Мусобақанинг вилоят босқичида туман ва шаҳар босқичларида ғолиб бўлган жамоалар ўзаро баҳслашди.

Якуний натижаларга кўра, Шаҳрихон туманидаги Қўрғонча маҳалласидан Шамсиддин Жалолов оиласи фахрли биринчи ўринни қўлга киритди. Пахтаобод тумани Сой маҳалласида яшовчи Насибжон Темиров оиласига иккинчи, Асака тумани Мирзаобод маҳалласидан Ҳусниддин Пардадинов оиласига учинчи ўрин насиб этди. Ғолиб ва совриндорлар диплом ва эсдалик совғалар билан тақдирланди.

Хотин-қизлар жамоалари ўртасида вилоят ҳокими кубоги учун ўтказилган волейбол мусобақасида Бўз тумани жамоаси биринчи ўринни қўлга киритиб, вилоят ҳокими кубоги соҳибига айланди. Марҳамат тумани жамоаси иккинчи, Асака тумани жамоаси учинчи ўринга сазовор бўлди.

Ф.Убайдуллаев, З.Умурзоқов (сурат), ЎзА