Андижонда спортнинг ривожланиш ҳолати ишчи гуруҳ эътиборида

Спорт вазирлиги ва МОҚ мутасаддиларининг навбатдаги манзили Андижон вилояти бўлди. Расмийларга вилоят ҳокими Шуҳратбек Абдурахманов ҳамроҳлик қилди.

Дастлаб ишчи гуруҳ Андижон шаҳридаги “Универсал” спорт мажмуасига ташриф буюрди. Буткул янгича қиёфа очган арена жорий йил футзал бўйича жаҳон чемпионатининг 8 та учрашувига мезбонлик қилди. Ҳозирги кунда мажмуада жамоавий спорт турлари билан шуғулланиш учун қулай имконият мавжуд. Мутасаддилар ўрганиш ишлари давомида мазкур жиҳатни ҳам инобатга олган ҳолда йирик мусобақаларга тайёргарлик кўришда ушбу арена имкониятларидан фойдаланиш, қолаверса, унда Республика ва халқаро миқёсдаги мусобақаларни ўтказиш борасидаги таклифларни илгари суришди. Бундан ташқари, Балиқчи ва Асака туманларидаги БЎСМ ва ИБЎСМларнинг ҳам фаолияти ўрганилди.

Шундан сўнг вилоятдаги асосий спорт таълим муассасаси бўлган Андижон Олимпия ва Паралимпия спорт турларига тайёрлаш маркази ишчи гуруҳ эътибор марказида бўлди. Расмийлар марказда таҳсил олаётган ёшларнинг дарс жадваллари ва уларга яратилган шароитлар билан батафсил танишишди. Шундан сўнг вилоят ҳокимлиги, спорт бошқармаси ҳамда федерацияларнинг ҳудудий вакиллари билан йиғилиш ўтказилди. Унда Андижон бокс мактабининг шуҳратини янада юксалтириш, бир пайтлар вилоятда Собиқ Иттифоқ миқёсида катта мавқега эга бўлган чим устида хоккей спортини тиклаш борасида ҳам сўз борди.

Андижон вилоятининг янги Олимпия сиклига тайёргарлик режаси таҳлил қилинган ушбу суҳбатда Лос-Анжелес-2028 ёзги Олимпия ўйинларига ҳозирлик кўриш борасида комплекс чоралар муҳокама қилинди. Якунда ҳудудий вакилларнинг мавзу юзасидан таклифлари ўрганилиб, олий спортдаги натижаларни ошириш бўйича вазифалар белгилаб олинди.