Андижонда халқаро талабларга жавоб берадиган “Универсал” спорт мажмуаси барпо этилмоқда

Ўзбекистон Республикаси Президентининг 2017 йил 6 майдаги “Жисмоний тарбия ва спорт давлат қўмитаси ҳузуридаги Болалар спортини ривожлантириш жамғармасининг 2017 йилги бюджетини ва болалар спорти объектлари, сузиш ҳавзаларини қуриш, реконструкция қилиш ва капитал таъмирлаш манзилли дастурини тасдиқлаш тўғрисида»ги ПҚ–2961-сонли қарорига асосан вилоятда Болалар спортини ривожлантириш жамғармаси маблағлари ҳисобидан 2017 йилда Андижон шаҳридаги «Универсал» спорт мажмуасининг қурилиши бошланган бўлиб, 2017 йилда ушбу объектдаги қурилиш-монтаж ишлари учун манзилли дастурга 15 млрд сўм маблағ йўналтирилган. Объектга «Хон» МЧЖ корхонаси бош пудратчи ташкилот этиб белгиланган.

Ўтган 2017-2020 йиллар мобайнида Андижон шаҳридаги «Универсал» спорт мажмуасида жами 66,4 млрд сўмлик қурилиш-монтаж ишлари амалга оширилган.

Шунингдек, Ўзбекистон Республикаси Президентининг 2020 йил 12 январдаги ПҚ–4565-сонли қарорига асосан тасдиқланган инвестиция дастурида «Универсал» спорт мажмуаси қурилиши учун 30 млрд. сўм маблағ ажратилган. Ҳозирда объектда қурилиш-монтаж ишлари давом этмоқда. Ушбу қарор иловасига асосан «Универсал» спорт мажмуаси қурилиши 2017-2022 йилларда олиб борилиши кўзда тутилган.

Ҳозирда объектнинг барча этажларида бетон-монолит қуйиш ишлари охирига етказилиб, объектнинг том қисмини ёпиш учун тайёр ҳолга келтирилган.

Спорт мажмуаси 6.3 гектар майдонни ўз ичига олади. Қолаверса, лойиҳага асосан мажмуа жами 4000 томошабинга мўлжалланган бўлиб, у спортнинг якка кураш, бадиий гимнастика, бокс, волейбол, гандбол, таэквондо ҳамда баскетбол турларига ихтисослашган. Лойиҳа доирасида 11х25м. ўлчамдаги сузиш ҳавзаси, теннис корти ва 100 ўринли ошхона қурилмоқда.

Ушбу спорт мажмуаси сейсмик жиҳатдан 9 баллга жавоб беради.

Ҳудудда 200 автомобилга мўлжалланган автотураргоҳ ҳам барпо этилади.

Объектнинг том қисмини йиғма металл конструкция билан ёпиш бўйича барча ҳисоб-китоб ишлари амалга оширилиб, металл конструкция ишлаб чиқарувчи ташкилотга буюртма берилган. Мазкур объектни 2022 йил якунига қадар фойдаланишга топшириш режалаштирилган.