Андижонлик ёш гандболчилар кубок соҳиби бўлди

Аввал хабар қилинганидек, Андижон шаҳридаги универсал спорт мажмуасида 17-30 ёшли маҳалла ёшлари ўртасида ўтказилган гандбол мусобақасининг республика финал босқичида Қорақалпоғистон Республикаси ва вилоятларда биринчи ўринни қўлга киритган маҳалла жамоалари иштирок этиб, ғолиблик учун ўзаро баҳс олиб борди. 

Мусобақанинг ҳар бир учрашуви қизиқарли ва муросасиз баҳслар остида ўтди. Финалда барча рақибларидан устун келган Андижон вилояти Қўрғонтепа туманининг Обод турмуш ҳамда Жиззах вилоятидаги Совунгарлик маҳалласи жамоалари ўзаро куч синашди. Учрашувда андижонлик гандболчилар 32:28 ҳисобида жиззахлик тенгдошларини мағлубиятга учратиб, “Ўзбекистон маҳаллалар уюшмаси кубоги”ни қўлга киритди. 

– Жамоамиз учун ўйинлар осон кечмади, – дейди Обод турмуш маҳалласи жамоаси аъзоси Шоҳжаҳон Абдуллаев. – Аввалги ўйинларда Самарқанд ва Наманган вилояти жамоаларини мағлубиятга учратган эдик. Финалда жиззахлик тенгдошларимиздан устун келиб, бош соврин соҳиби бўлдик. Ушбу ғалабамиз туфайли маҳалламизда универсал спорт майдончаси барпо этиладиган бўлди. Бундан беҳад хурсандмиз. 

Учинчи ўрин учун ўтказилган учрашув ҳам жуда қизиқарли ўтди. Унда Тошкент шаҳрининг Дилбулоқ маҳалласи жамоаси Сурхондарё вилояти Жайхун маҳалласи жамоасини 22:21 ҳисобида мағлубиятга учратиб, 3-ўринга сазовор бўлди. 

Учрашувлардан сўнг ғолиб ва совриндорлар тантанали равишда тақдирланди. Уларга кубок, тегишли медаль ва эсдалик совғаларни Ўзбекистон Маҳаллалар уюшмаси раиси Қаҳрамон Қуронбоев, Ўзбекистон Ёшлар ишлари агентлиги раҳбари Алишер Саъдуллаев, Андижон вилояти ҳокими ўринбосари Комилжон Комилов топширди.