АҚШ профессионал боксчиларига терма жамоа сафида жанг қилиш имконини берди

Қарор Лос-Анжелес-2028 Олимпиадаси олдидан АҚШ терма жамоасини кучайтиришга қаратилган.

5–12 декабрь кунлари профессионал боксчилар учун саралаш турнири ўтказилиши режалаштирилган. Унда муваффақиятли қатнашган спортчилар 2027 йилдан бошлаб терма жамоа таркибига кириш ва Олимпиада йўлланмаси учун курашиш имконига эга бўлади.

Профессионал боксчиларнинг Олимпия ўйинларида қатнашишига 2016 йилдан бери рухсат берилган. Бироқ USA Boxing шу пайтгача профессионал боксчиларни миллий терма жамоа тизимига қўшмаган эди. USA Boxing баёнотида ташкилотнинг асосий мақсади энг кучли таркибни шакллантириш экани таъкидланган.

«Бизнинг мақсадимиз — АҚШнинг имкон қадар кучли терма жамоасини шакллантириш. Ушбу тизим белгиланган талабларга жавоб берадиган америкалик боксчиларга, улар ҳаваскор ёки профессионал бўлишидан қатъи назар, терма жамоадан жой олиш учун курашиш имконини беради», — дейилади баёнотда.

Ташкилотга кўра, янги тизим USA Boxing директорлар кенгаши, федерация ходимлари ва АҚШ Олимпия қўмитаси билан маслаҳатлашувлар натижасида ишлаб чиқилган.

Профессионал боксчиларнинг Олимпия ўйинларида қатнашиши янги ҳолат эмас. 2016 йилги Рио Олимпиадасида собиқ WBA ва WBO ўрта вазн чемпиони Ҳасан Н’Дам Н’Жикам ҳамда собиқ IBF энг енгил вазн чемпиони Амнат Руенроенг иштирок этган.

Сўнгги Олимпиадаларда эса бир қатор боксчилар профессионал фаолият билан бирга Олимпия боксида ҳам қатнашган. Жумладан, Париж-2024 ўйинларида Ўзбекистон вакиллари Баҳодир Жалолов ва Ҳасанбой Дўсматов, шунингдек, қозоғистонлик Камшибек Конкабаев профессионал жанглар ўтказиб келаётганига қарамай, ўз терма жамоалари сафида қатнашган.

Шу билан бирга, WBC профессионал боксчиларнинг Олимпиадада қатнашишига қарши позицияда қолмоқда. Ташкилот рейтингининг TOP-15 талигига кирган боксчилар учун бундай иштирок икки йиллик четлатиш билан якунланиши мумкинлиги қайд этилган.