АҚШ таркибида Олимпиада бронза медалини қўлга киритган Гулруҳбегимнинг натижалари қандай бўлди?

Агар америкаликлар сўнгги турда қозоғистонлик дугоналарини мағлуб этишганида, кумуш медалларга эга чиқишлари ҳам мумкин эди. Айнан сўнгги турда АҚШ терма жамоасининг биринчи тахтасида ўйнаган ҳамюртимиз Гулруҳбегим Тоҳиржонова энг ёш жаҳон чемпиони Бибисара Ассаубаевага имкониятни бой бериб қўйди. Якунда АҚШ ва Қозоғистон 2:2 ҳисобидаги дурангга имзо чекишди. Бу эса Қозоғистонга кумуш медалларни тақдим этди. 

Умуман олганда, Тоҳиржонова 45-Бутунжаҳон шахмат Олимпиадасида қандай натижа кўрсатди? У 11 та турнинг 10 тасида иштирок этди. Фақат Ўзбекистонга қарши учрашувда ватанпарварлиги сабабидан ўйнамади. Қолган 10 та учрашувда 3 ғалаба, 4 дуранг ва 3 мағлубият қайд этди. Рейтингда ўзидан юқорида жойлашган ҳиндистонлик Рамешбабу Вайшали, украиналик Юлия Осмакни мағлуб этишга муваффақ бўлди. Филиппин, Канада, Нидерландия, Швейцария терма жамоалари шахматчилари билан дуранг ўйнади. Бибисарадан ташқари, Мўғулистон ва Арманистон терма жамоалари шахматчиларига ютқазиб қўйди. 

"Бу АҚШ терма жамоасининг Олимпиадада 16 йил кутган медали! Шу жамоа таркибида мен ҳам совриндор бўлганимдан хурсандман", - дея қувончини изҳор қилди Тоҳиржонова.